Deddf Iechyd y Cyhoedd (Cymru) 2017

Mae Deddf Iechyd y Cyhoedd (Cymru) 2017 yn cynnwys darpariaethau sy’n ymdrin ag amrywiol faterion iechyd y cyhoedd yng Nghymru. Mae’n canolbwyntio’n bennaf ar lywio’r amodau cymdeithasol sy’n annog iechyd da ac os oes modd, ar osgoi niwed i iechyd y gellir ei atal.

Mae darpariaethau’r Ddeddf yn cynnwys:

strategaeth genedlaethol i fynd i’r afael â gordewdra,
cyfyngiadau ar y defnydd o dybaco a chynhyrchion nicotin ac ar eu gwerthu, gan gynnwys cyflwyno troseddau newydd,
trwyddedu rhoi ‘triniaethau arbennig’ yng Nghymru (aciwbigo, tyllu’r corff, electrolysis a thatŵio),
ei gwneud yn drosedd i berson yng Nghymru ‘roi twll mewn rhan bersonol o’r corff’ i berson o dan 18 oed,
ei gwneud yn ofynnol i Weinidogion Cymru wneud rheoliadau sy’n ei gwneud yn ofynnol i gyrff cyhoeddus gynnal asesiadau o’r effaith ar iechyd,
ei gwneud yn ofynnol i Fyrddau Iechyd Lleol lunio a chyhoeddi asesiad o’r angen am wasanaethau fferyllol yn ei ardal,
ei gwneud yn ofynnol i awdurdodau lleol lunio a chyhoeddi strategaeth toiledau lleol ac ailddatgan y pŵer statudol presennol iddynt ddarparu toiledau yn eu hardal.

Mae’r Nodiadau Esboniadol i’r Ddeddf yn rhoi sylwebaeth fanwl ar y darpariaethau amrywiol.

Dod i rym

Daeth adrannau 1, 120 i 125, 126 ac 127 o’r Ddeddf i rym ar 3 Gorffennaf 2017, sef y diwrnod y cafodd y Ddeddf y Cydsyniad Brehinol, yn unol ag adran 126(1). Daw gweddill y darpariaethau i rym ar ddiwrnod a bennir gan Weinidogion Cymru mewn gorchymyn a wneir drwy offeryn statudol, yn unol ag adran 126(2). Mae’r gorchmynion a ganlyn wedi eu gwneud:

Is-ddeddfwriaeth a wnaed o dan y Ddeddf:

Enw	Rhif	Dyddiad gwnaed	Dyddiad dod i rym	Dogfennau ategol
Rheoliadau Pwyllgorau Trwyddedu Triniaethau Arbennig (Cymru) 2024	2024 Rhif 969 (Cy. 164)	17 Medi 2024	29 Tachwedd 2024	Memorandwm Esboniadol
Rheoliadau Mangreoedd a Cherbydau Di-fwg (Cymru) 2020	2020 Rhif 1211 (Cy. 273)	26 Hydref 2020	1 Mawrth 2021	Memorandwm Esboniadol
Rheoliadau Gwrthrychau Rhagnodedig ar gyfer Rhoi Twll mewn Rhan Bersonol o’r Corff (Cymru) 2019	2019 Rhif 1120 (Cy. 194)	11 Gorffennaf 2019	1 Awst 2019	Memorandwm Esboniadol

Ystyriaeth y Senedd o’r ddeddfwriaeth:

Cyflwynwyd y Bil ar 7 Tachwedd 2016 gan Rebecca Evans AS, a oedd yn Weinidog Iechyd y Cyhoedd a Gwasanaethau Cymdeithasol ar y pryd. Cafodd ei basio gan Senedd Cymru (Cynulliad Cenedlaethol Cymru bryd hynny) ar 16 Mai 2017.

Mae rhagor o wybodaeth am y Bil ar gael ar wefan y Senedd, gan gynnwys cofnod o hynt y Bil drwy’r Senedd (Cynulliad Cenedlaethol Cymru bryd hynny) a’r Memorandwm Esboniadol a luniwyd gan Lywodraeth Cymru (fel y cafodd ei ddiwygio ar ôl Cyfnod 2).

Cafodd y Ddeddf y Cydsyniad Brenhinol ar 3 Gorffennaf 2017.

Erthyglau a gwybodaeth gysylltiedig:

Ymchwil y Senedd: Crynodeb o'r Ddeddf

Ymchwil y Senedd: Y wybodaeth ddiweddaraf am Ddeddf Iechyd y Cyhoedd (Cymru) 2017