Deddf Lefelau Staff Nyrsio (Cymru) 2016

Mae Deddf Lefelau Staff Nyrsio (Cymru) 2016 (Deddf 2016) yn sicrhau bod lefelau staff nyrsio o fewn y Gwasanaeth Iechyd Gwladol yng Nghymru (GIG Cymru) yn ddigonol i ddarparu gofal nyrsio diogel, effeithiol a safonol i gleifion bob amser drwy:

• gosod dyletswydd gyffredinol ar holl gyrff gwasanaethau iechyd GIG Cymru (Byrddau Iechyd Lleol ac Ymddiriedolaethau’r GIG) i roi sylw i bwysigrwydd sicrhau bod digon o nyrsys ar gael i ofalu’n sensitif am gleifion, boed hwy’n darparu’r gwasanaethau hynny eu hunain neu’n sicrhau gwasanaethau nyrsio gan eraill
• gosod dyletswydd ar holl gyrff gwasanaethau iechyd GIG Cymru (os ydynt yn darparu gwasanaethau nyrsio) i ddynodi personau i gyfrifo lefelau staff nyrsio diogel ac addas yn lleol
• gosod dyletswydd ar holl gyrff gwasanaethau iechyd GIG Cymru i gynnal y lefelau staffio hynny, mewn wardiau cleifion mewnol sy’n oedolion mewn ysbytai acíwt i ddechrau (mae’r ddyletswydd hon wedi ei hestyn i leoliadau eraill drwy reoliadau - gweler isod) 
• gosod dyletswydd ar Weinidogion Cymru i gyhoeddi canllawiau ar y ddyletswydd i gyfrifo lefelau staff nyrsio a’r dull o gyfrifo’r lefelau hynny, gan sicrhau bod ffactorau fel dyletswyddau goruchwylio’r staff, sgiliau a phrofiad nyrsys a staff eraill sy’n darparu gofal, ac amgylchedd y ward, yn cael eu hystyried yn briodol
• gosod dyletswydd ar gyrff gwasanaethau iechyd GIG Cymru i adrodd i Lywodraeth Cymru ar gydymffurfio â’r gofynion o ran lefelau staff nyrsio ac unrhyw gamau a gymerwyd mewn ymateb i ddiffygion.

Mae’r Nodiadau Esboniadol i Ddeddf 2016 yn rhoi sylwebaeth fanwl ar y darpariaethau amrywiol. 

Dod i rym:

Daeth Deddf 2016 i rym ar 21 Mawrth 2016, sef y diwrnod y cafodd y Cydsyniad Brenhinol, yn unol ag adran 2(1). Mae’r adran hon hefyd yn darparu bod adran 1 yn dod i rym pan fydd Gweinidogion Cymru yn gwneud un neu ragor o orchmynion. Mae’r gorchmynion a ganlyn wedi eu gwneud:

Gorchymyn Deddf Lefelau Staff Nyrsio (Cymru) 2016 (Cychwyn) 2016
Gorchymyn Deddf Lefelau Staff Nyrsio (Cymru) 2016 (Cychwyn Rhif 2) 2021

Is-ddeddfwriaeth a wnaed o dan y Ddeddf:

Ystyriaeth y Senedd o’r ddeddfwriaeth:

Cyflwynwyd y Bil gan Kirsty Williams AC ar 1 Rhagfyr 2014. Roedd hi wedi llwyddo mewn pleidlais ddeddfwriaethol a gynhaliwyd ar 11 Rhagfyr 2013 ac wedi cael caniatâd i symud ymlaen â'i Bil gan y Senedd (Cynulliad Cenedlaethol ar y pryd) ar 5 Mawrth 2014. Fe’i pasiwyd gan Senedd Cymru (a oedd yn cael ei adnabod fel Cynulliad Cenedlaethol Cymru bryd hynny) ar 10 Chwefror 2016.

Mae rhagor o wybodaeth am y Bil ar gael ar wefan y Senedd, gan gynnwys cofnod o hynt y Bil drwy’r Senedd a’r Memorandwm Esboniadol a luniwyd gan Kirsty Williams AC (fel y cafodd ei ddiwygio ar ôl Cyfnod 2). Lluniodd y Cynulliad y Crynodeb defnyddiol hwn o’r Bil hefyd.  

Cafodd y Ddeddf y Cydsyniad Brenhinol ar 21 Mawrth 2016.