Deddf Tribiwnlys Adolygu Iechyd Meddwl Cymru (Aelodaeth) 2026
Mae Deddf Tribiwnlys Adolygu Iechyd Meddwl Cymru (Aelodaeth) 2026 (“Deddf 2026”) yn gwneud diwygiadau i’r maen prawf cymhwyso ar gyfer aelodaeth feddygol o Dribiwnlys Adolygu Iechyd Meddwl Cymru; ac yn gwneud darpariaeth ôl-weithredol gysylltiedig ynghylch dilysrwydd penodiadau blaenorol i’r Tribiwnlys hwnnw ac aelodaeth ohono.
Mae Deddf 2026:
yn darparu bod rhaid i aelodau meddygol o’r Tribiwnlys hwnnw fod yn ymarferwyr meddygol cofrestredig (a ddiffinnir fel person cofrestredig llawn o fewn ystyr Deddf Meddygaeth 1983), ond nad oes angen iddynt ddal trwydded i ymarfer o dan y Ddeddf honno;
yn gosod dyletswydd ar Weinidogion Cymru i gynnal adolygiad o’r trefniadau hyfforddiant a gynhelir gan Lywydd Tribiwnlysoedd Cymru o dan adran 60(5)(a) o Ddeddf Cymru 2017 ar gyfer aelodau meddygol o Dribiwnlys Adolygu Iechyd Meddwl Cymru nad ydynt yn dal trwyddedau i ymarfer o dan Ddeddf Meddygaeth 1983;
yn gosod dyletswydd arall ar Weinidogion Cymru i gyhoeddi adroddiad o’r adolygiad heb fod yn hwyrach na 12 mis ar ôl y diwrnod y daw’r Ddeddf i rym.
Mae’r Nodiadau Esboniadol i Ddeddf 2026 yn rhoi sylwebaeth fanwl ar y darpariaethau amrywiol (darperir dolen at y Nodiadau Esboniadol ar wefan deddfwriaeth.gov.uk pan fydd ar gael; gweler hefyd y Memorandwm Esboniadol, isod).
Dod i rym
Yn unol ag adran 3 o Ddeddf 2026, daeth holl ddarpariaethau’r Ddeddf i rym ar 22 Ionawr 2026. Nid oedd unrhyw orchmynion cychwyn yn ofynnol.
Is-ddeddfwriaeth a wnaed o dan Ddeddf 2026
Nid yw Deddf 2026 yn cynnwys unrhyw bwerau i wneud is-ddeddfwriaeth.
Ystyriaeth y Senedd o’r ddeddfwriaeth
Cafodd y Bil ei gyflwyno i’r Senedd o dan weithdrefnau brys ar 13 Ionawr 2026 gan y Cwnsler Cyffredinol a’r Gweinidog Cyflawni (ar y pryd). Cafodd y Bil ei basio gan y Senedd ar 14 Ionawr 2026 a chafodd y Cydsyniad Brenhinol ar 21 Ionawr 2026.
Mae rhagor o wybodaeth am Ddeddf 2026 ar gael ar wefan y Senedd gan gynnwys cofnod o hynt y Bil drwy’r Senedd.
Cafodd Memorandwm Esboniadol ei lunio’n wreiddiol i’w ystyried gan y Senedd ochr yn ochr â’r Bil. Mae hwn wedi’i ddiwygio a’i ddiweddaru bellach i adlewyrchu ffurf derfynol Deddf 2026.
Erthyglau a gwybodaeth gysylltiedig
Gwybodaeth ynghylch Tribiwnlys Adolygu Iechyd Meddwl Cymru (LLYW.CYMRU)
https://www.llyw.cymru/tribiwnlys-adolygu-iechyd-meddwl-cymru