Mesur Diogelwch ar Gludiant i Ddysgwyr (Cymru) 2011
Mae Mesur Diogelwch ar Gludiant Dysgwyr (Cymru) 2011 (‘Mesur 2011’) yn gwneud diwygiadau i Fesur Teithio gan Ddysgwyr (Cymru) 2008. Nod y gwelliannau hyn yw cyflawni amcan Llywodraeth Cymru o wella delwedd ddiogelwch a phrofiadau teithio ar gerbydau penodedig sy’n darparu cludiant i’r ysgol, a sicrhau bod safonau diogelwch yn ddigon uchel i’r cyhoedd a rhieni fod â hyder mewn cludiant penodedig ar gyfer dysgwyr.
Mae Mesur 2011 yn rhoi pwerau i Weinidogion Cymru (ym Mesur 2008) i wneud rheoliadau i osod dyletswyddau ar awdurdodau lleol neu gorff llywodraethu ysgol a gynhelir i:
- gosod gwregysau diogelwch priodol;
- defnyddio cerbydau unllawr yn unig;
- defnyddio bysiau sydd wedi eu gweithgynhyrchu ar ôl dyddiad penodol;
- gosod camerâu cylch cyfyng ar fysiau;
- defnyddio cerbydau sy’n bodloni’r fanyleb ar gyfer “bysiau melyn”;
- darparu’r safonau perthnasol o ran hyfforddiant gyrwyr;
- cynnal asesiadau risg diogelwch;
- darparu staff i oruchwylio bysiau ysgol; a
- darparu manylebau mewn perthynas â thacsis a cherbydau hurio preifat.
Er mwyn sicrhau cydymffurfedd â’r dyletswyddau hyn, mae diwygiadau Mesur 2011 hefyd yn galluogi Gweinidogion Cymru i:
- creu troseddau os yw darparwyr cludiant ar gyfer dysgwyr yn torri’r rheoliadau diogelwch drwy fethu â bodloni’r gofynion rhagnodedig;
- creu trefn sancsiynau sifil os yw darparwyr cludiant ar gyfer dysgwyr yn torri’r rheoliadau diogelwch drwy fethu â bodloni’r gofynion rhagnodedig;
- sefydlu corff gorfodi i orfodi rheoliadau; a
- sefydlu tribiwnlys ar gyfer apeliadau.
Mae’r Nodiadau Esboniadol i’r Mesur yn rhoi sylwebaeth fanwl ar y gwahanol ddarpariaethau.
Dod i rym
Daeth adran 1 o Fesur 2011 i rym ar 1 Hydref 2014 yn unol ag adran 16(1).
Daeth gweddill darpariaethau’r Mesur i rym ar ddiwedd y cyfnod o ddau fis yn dilyn y Gymeradwyaeth Frenhinol (mewn geiriau eraill ar 10 Gorffennaf 2011 ).
Is-ddeddfwriaeth a wnaed o dan y Mesur
Ni wnaed unrhyw is-ddeddfwriaeth o dan Fesur 2011; mewnosodwyd y pwerau i wneud is-ddeddfwriaeth ym Mesur 2008.
Ystyriaeth y Senedd o’r ddeddfwriaeth
Cyflwynwyd y Mesur ar 20 Medi 2010 gan Ieuan Wyn Jones AC, y Dirprwy Brif Weinidog a Gweinidog yr Economi a Thrafnidiaeth ar y pryd. Pasiwyd y Mesur gan Senedd Cymru (Cynulliad Cenedlaethol Cymru bryd hynny) ar 22 Mawrth 2011.
Mae mwy o wybodaeth am y Mesur ar gael ar wefan y Senedd gan gynnwys cofnod o hynt y Mesur drwy’r Senedd a’r Memorandwm Esboniadol a baratowyd gan Lywodraeth Cymru (wrth gyflwyno’r Mesur arfaethedig).
Cafodd y Mesur y Gymeradwyaeth Frenhinol ar 10 Mai 2011.